من كام يوم، حكيمة شابة (أو بالأصح… زوجتي!) بصّت لي وقالت بلطف:
“روب، عادي إنك تحس إنك متضايق أو متعكر المزاج أوقات… الأسبوع ده كان صعب.”
التعكر أو الضيق في المزاج يمكن يبان أقل رد فعل عدواني ممكن الواحد يظهره في ظروف معينة. بيبان حاجة بسيطة… شبه حالة مزاجية أو ضيق هيعدي. لكن الكتاب المقدس بيتعامل معاه بجدية أكبر، لأنه بهدوء بيغيّر القلب، وبيشوّه شهادتنا، وبيجرح أقرب الناس لينا.
والكتاب المقدس بيقول:
📖 “اَلرَّجُلُ الْغَضُوبُ يُهَيِّجُ الْخُصُومَةَ، وَبَطِيءُ الْغَضَبِ يُسَكِّنُ الْخِصَامَ.” (أمثال 15: 18)
علشان كده، قررت أعمل شوية بحث وتقليب في كلمة الله، وأشوف هي بتقول إيه عن المشكلة اللي شكلها صغير، لكنها بتأثر على شهادتنا قدام الآخرين.
وللأمانة، اكتشفت كنزًا ضخمًا من الآيات اللي تساعدني أنا وإنت نحارب الشرارة الصغيرة دي قبل ما تتحول لحريق كبير.
ولو حبينا نعرّف التعكر أو الضيق في المزاج، ممكن نقول إنه غالبًا بيكون وراه تعب، أو إحباط، أو كبرياء، أو طلب داخلي مش بيتقال بصوت عالي: “لازم الأمور تمشي بالطريقة اللي أنا عايزها.”
ولما الطلب ده ما يتحققش، الروح بتبتدي تفسد. واللي بيبدأ جوا القلب، بسرعة يطلع بره… في نبرة الصوت، أو قلة الصبر، أو كلمة حادة تفضل معلقة في قلب اللي سمعها أكتر مما نتوقع.
الروح المتذمرة بتكشف عن قلب بدأ، بدرجة أو بأخرى، يفقد تمسكه بالنعمة.
بننسى قد إيه الله صبور معانا… فنبخل بالصبر على غيرنا.
وبننسى الرحمة… فنبقى قاسين في أحكامنا.
وبننسى الفرح… فنبقى وجودنا تقيل على اللي حوالينا.
ويسوع بيركز على أصل المشكلة، مش على نتيجتها بس. فقال:
“فَإِنَّهُ مِنْ فَضْلَةِ الْقَلْبِ يَتَكَلَّمُ الْفَمُ.” (متى 12: 34)
وهنا لازم نقف قدام الصورة المختلفة اللي بيقدمها بولس الرسول للمؤمن في رسالته إلى أهل غلاطية:
📖 “وَأَمَّا ثَمَرُ الرُّوحِ فَهُوَ: مَحَبَّةٌ، فَرَحٌ، سَلاَمٌ، طُولُ أَنَاةٍ، لُطْفٌ، صَلاَحٌ، إِيمَانٌ، وَدَاعَةٌ، تَعَفُّفٌ. ضِدَّ أَمْثَالِ هذِهِ لَيْسَ نَامُوسٌ. وَلَكِنَّ الَّذِينَ هُمْ لِلْمَسِيحِ قَدْ صَلَبُوا الْجَسَدَ مَعَ الأَهْوَاءِ وَالشَّهَوَاتِ. إِنْ كُنَّا نَعِيشُ بِالرُّوحِ، فَلْنَسْلُكْ أَيْضًا بِحَسَبِ الرُّوحِ.” (غلاطية 5: 22–25)
القلب المتذمر وسريع الضيق بيفقد حساسيته تجاه حضور الله. زي شعب إسرائيل في البرية، الشكوى المستمرة بتعمينا عن عطايا الله اليومية. النفس بتبقى مركزة على الإزعاج أكتر من تركيزها على النعمة.
وبيقول بولس:
📖 “اِفْعَلُوا كُلَّ شَيْءٍ بِلاَ دَمْدَمَةٍ وَلاَ مُجَادَلَةٍ، لِكَيْ تَكُونُوا بِلاَ لَوْمٍ وَبُسَطَاءَ، أَوْلاَدَا للهِ بِلاَ عَيْبٍ… الَّذِينَ بَيْنَهُمْ تُضِيئُونَ كَأَنْوَارٍ فِي الْعَالَمِ.” (فيلبي 2: 14–15)
لاحظ إن التحرر من التذمر مرتبط بإننا نضيء.
الروح الهادئة والصبورة مش علامة ضعف… لكنها شهادة مضيئة في عالم قاسي وسريع الانفعال.
وبصراحة… العالم ده محتاج عصبية أقل… وسلام أكتر!!
إخوتي وأخواتي، إحنا مدعوين نعيش حياة تليق بالدعوة اللي دعانا بيها ربنا. وعايز أقول لكم… وأفكر نفسي كمان… إن التعكر الدائم والضيق المستمر ما ينفعوش يكونوا جزء من الحياة دي.
أنا شخصيًا ضفت الآية دي في ملاحظاتي على Google، وعملتلها تمييز ولون واضح وخط عريض، علشان تفضل قدام عيني طول الوقت:
📖 “اجْعَلْ يَا رَبُّ حَارِسًا لِفَمِي. احْفَظْ بَابَ شَفَتَيَّ.” (مزمور 141: 3)
صلاة
يا رب يسوع،
أنت وديع ومتواضع القلب.
سامحني على الحدة، وعلى الضيق، وعلى الثقل اللي ساعات بدخّلهم في علاقتي مع الناس.
نقّي اللي مستخبي تحت تعكري...
كبريائي...
وتعبي...
وتوقعاتي الغلط.
املاني بروحك القدوس، علشان أعكس لطفك وسلامك.
خلّي وجودي يبقى مكان راحة للناس، مش مصدر توتر.
وخلي حياتي تضيء بهدوء بنعمتك.
آمين

مع خالص محبتي (قسيس روب)
راعي كنيسة بورت إليزابيث- جنوب افريقيا



